Պարոդոնտը հյուսվածքների կոմպլեքս է, որը շրջապատում է ատամը և ապահովում նրա ամրացումը ծնոտի ոսկորներում։ Այս կոմպլեքսը ներառում է լինդը, ատամի արմատը ոսկրային փոսիկի հետ կապող պարոդոնտալ կապանը, ալվեոլային ոսկրային հյուսվածքը և ատամի արմատի ցեմենտը։
Ստոմատոլոգիայի արդի խնդիրների շարքում պարոդոնտալ հիվանդությունները առաջատար դիրք են զբաղեցնում։ ԱՀԿ տվյալներով՝ պարոդոնտի ընդգծված դեստրուկտիվ փոփոխությունները՝ ոսկրային հյուսվածքի գործընթացի ներգրավմամբ, առավել հաճախ հայտնաբերվում են 35-44 տարեկան մարդկանց մոտ՝ 65%-ից մինչև 98%, իսկ 13-19 տարեկանների մոտ՝ 55%-ից մինչև 95%: Պարոդոնտալ հիվանդությունները բացասական ազդեցություն են ունենում մարսողության, հոգե-հուզական ոլորտի վրա, նվազեցնում են օրգանիզմի դիմադրողականությունը վարակիչ և այլ գործոնների հանդեպ և հանգեցնում են օրգանիզմի զգայունության բարձրացման: Հիվանդներին անհանգստացնում են լնդերի բորբոքումը, արնահոսությունը և հատկապես ռեցեսիան (լնդի մակարդակի անկումը), ինչը հանգեցնում է ատամների վզիկի երկարացման և համապատասխանաբար՝ էսթետիկական խանգարումների: Պարոդոնտի բոլոր հիվանդությունների 90-95%-ը բորբոքային է, օրինակ՝ գինգիվիտը և պարոդոնտիտը։
Գինգիվիտ, պարոդոնտիտ, պարոդոնտոզ
- Գինգիվիտը բորբոքային պրոցես է լնդերի եզրային հյուսվածքներում, որի դեպքում ախտահարվում են լնդերի միայն մակերեսային հյուսվածքները։
- Պարոդոնտիտը բորբոքային պրոցես է, որի մեջ ներգրավված են պարոդոնտի բոլոր հատվածները։ Այն բնութագրվում է ատամնալնդային հանգույցի քայքայմամբ և ծնոտի ոսկորների ալվեոլային ելունդների դեստրուկցիայով։
- Գինգիվիտը և պարոդոնտիտը 2 փոխկապակցված հիվանդություններ են, քանի որ բորբոքային պրոցեսը առաջանում է սկզբում լնդի հյուսվածքներում, այնուհետև ներգրավվում են նաև պարոդոնտի հարակից հատվածները՝․ ատամնալնդային հանգույցը և ալվեոլային ոսկորը:
Պարոդոնտոզի հիմքում պարոդոնտի հյուսվածքների ատրոֆիկ-դիստրոֆիկ գործընթացն է։ Հիվանդությունն ունի բավական սուղ ախտանիշներ և դանդաղ ընթացք։ Դրա առաջացման պատճառը դեռևս բացահայտված չէ։
Ի՞նչն է ստիպում բուժառուներին դիմել բժշկի: Հիմնականում սա կոսմետիկ թերություն է, որն արտահայտվում է ատամների արմատների մերկացմամբ։ Բուժառուները դժգոհում են, որ «լնդերը նստում են, իսկ ատամները՝ երկարում»։ Որոշ դեպքերում հիվանդներին անհանգստացնում է լնդերի քորը, ինչպես նաև բաց ատամնավզիկների ցավը:
Պարոդոնտոզի էթիոտրոպային բուժում գոյություն չունի, քանի որ հիվանդության պատճառը պարզված չէ: Պարոդոնտոզի դեպքում իրականացվում է միայն սիմպտոմատիկ բուժում՝ ատամների գերզգայունության վերացում, լնդերի մերսում կամ ինքնամերսում՝ տրոֆիկ խանգարումները շտկելու նպատակով, այսպես կոչված սեպաձև արատների պլոմբավորում։ Երբեմն նշանակվում են վեստիբուլապլաստիկ վիրահատություններ:
